ಮಾರ್ಚ್ 4ರಂದು ನಾವೂರು ಕೂಡಿಬೈಲಿನಲ್ಲಿ “ಬಂಟ್ವಾಳ ಕಂಬಳ”-ಭರದ ಸಿದ್ಧತೆ

‌‌ ಹತ್ತು ವರ್ಷ ಕಾವಳಕಟ್ಟೆಯಲ್ಲಿ ಮೂಡೂರು-ಪಡೂರು ಕಂಬಳವನ್ನು ಮಾದರಿಯಾಗಿ ನಡೆಸಲಾಗಿದೆ. ಈ ಕಂಬಳ ಕೂಟ ಕಂಬಳ ಕ್ಷೇತ್ರದಲ್ಲಿ ಕೆಲವು ಹೊಸ ದಾಖಲೆಗಳನ್ನು ಸೃಷ್ಠಿಸುವಲ್ಲಿ ಯಶಸ್ವಿಯಾಗಿದೆ. ಕೆಲವರ್ಷದ ಬಳಿಕ ಕಳೆದ ವರ್ಷ ಬಂಟ್ವಾಳ ತಾಲೂಕಿನ ನಾವೂರು ಕೂಡಿಬೈಲಿನಲ್ಲಿ ಸ್ಥಳೀಯರ ಸಹಕಾರದೊಂದಿಗೆ “ಬಂಟ್ವಾಳ ಕಂಬಳ” ಹೆಸರಿನಲ್ಲಿ ಹನ್ನೊಂದನೇ ವರ್ಷದ ಕಂಬಳವನ್ನು ನಡೆಸಲಾಗಿತ್ತು. ಅದು ಯಶಸ್ವಿಯಾಗಿ ಸಂಪನ್ನಗೊಂಡಿದ್ದು ಇದೀಗ ಹನ್ನೆರಡನೇ ವರ್ಷದ ಮೂಡೂರು-ಪಡೂರು “ಬಂಟ್ವಾಳ ಕಂಬಳ” ಮತ್ತಷ್ಟು ಮಾದರಿಯಾಗಿ ರೂಪಿಸುವ ಉದ್ಧೇಶದಿಂದ ವ್ಯಾಪಕ ಸಿದ್ಧತೆಗಳು ನಡೆಯುತ್ತಿದೆ ಎಂದು ಬಿ.ರಮಾನಾಥ ರೈ ಹೇಳಿದರು. ಮೂಡೂರು-ಪಡೂರು ಜೋಡುಕರೆ ಕಂಬಳ ಸಮಿತಿ ಬಂಟ್ವಾಳ ಆಶ್ರಯದಲ್ಲಿ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆಯವರ ಶುಭ ಆಶೀರ್ವಾದಗಳೊಂದಿಗೆ “ಬಂಟ್ವಾಳ ಕಂಬಳ”ವು ಸಮಿತಿಯ ಸಂಪೂರ್ಣ ತೊಡಗಿಸುವಿಕೆ, ಸ್ಥಳೀಯರ ಸಂಪೂರ್ಣ ಸಹಭಾಗಿತ್ವ ಹಾಗೂ ಸರ್ವ ಕಂಬಳಾಭಿಮಾನಿಗಳ ಸಹಕಾರದೊಂದಿಗೆ ಸೌಹಾರ್ದತೆಯ ಪ್ರತೀಕವಾಗಿ ಮೂಡಿಬರಲಿದೆ ಎಂದು ರೈ ವಿವರಿಸಿದರು. ಕಳೆದ ವರ್ಷ ಕಂಬಳ ಸೀಸನ್ ಕೊನೆಕ್ಷಣದಲ್ಲಿ ಕಂಬಳ ನಡೆಸಲಾಗಿತ್ತು. ಆದರೂ ಕೋಣದ ಮಾಲೀಕರು ಮತ್ತು ಜಿಲ್ಲಾ ಕಂಬಳ ಸಮಿತಿ ಸಹಕಾರದಿಂದ ಕಂಬಳ ಕೂಟ ಯಶಸ್ವಿಯಾಗಿತ್ತು. ಮಳೆಯಿಂದಾಗಿ ಕೆಲವೊಂದು ಸಮಸ್ಯೆ ಎದುರಾಗಿತ್ತು. ಆದರೆ ಈ ಬಾರಿ ಮಾರ್ಚ್ ತಿಂಗಳಲ್ಲೇ ಕಂಬಳ ಸಮಿತಿ ಅನುವು ಮಾಡಿಕೊಟ್ಟ ಹಿನ್ನಲೆಯಲ್ಲಿ ಮತ್ತಷ್ಟು ವ್ಯವಸ್ಥಿತವಾಗಿ ಕಂಬಳವನ್ನು ನಡೆಸಲು ಉದ್ದೇಶಿಸಲಾಗಿದೆ. ಈಗಾಗಲೇ ಜೋಡುಕರೆಗಳನ್ನು ಸರಿಪಡಿಸುವ ಕಾರ್ಯ ಸಹಿತ ಸಕಲ ಸಿದ್ಧತೆಗಳು ಭರದಿಂದ ನಡೆಯುತ್ತಿದೆ ಎಂದು ರೈ ಹೇಳಿದರು. ಸಮಿತಿಯ ಕೋರಿಕೆಯಂತೆ ಮಾರ್ಚ್ ತಿಂಗಳಿನಲ್ಲಿ ಕಂಬಳ ನಡೆಸಲು ಅವಕಾಶ ನೀಡಿದ ಜಿಲ್ಲಾ ಕಂಬಳ ಸಮಿತಿ ಮತ್ತು ಕಂಬಳದ ಯಶಸ್ವಿಗಾಗಿ ತೊಡಗಿಸಿಕೊಂಡಿರುವ ಸರ್ವಜನತೆಗೆ ಅಭಿನಂದನೆ ಸಲ್ಲಿಸಿದ ರಮಾನಾಥ ರೈ, ಸರ್ವ ಕಂಬಳಾಭಿಮಾನಿಗಳು ಕಂಬಳಕೂಟದಲ್ಲಿ ಪಾಲ್ಗೊಳ್ಳುವಂತೆ ಕರೆ ನೀಡಿದರು. ಈ ಬಾರಿ ಕಂಬಳ ಕೂಟವನ್ನು ಮತ್ತಷ್ಟು ವಿಜೃಂಭಣೆಯಿಂದ ನಡೆಸಲು ಉದ್ದೇಶಿಸಲಾಗಿದ್ದು ಊರಿನ ಜನತೆಗೆ ಹಬ್ಬವಾಗಿ-ಉತ್ಸವವಾಗಿ ಮೂಡಿಬರಲಿದೆ. ವಿವಿಧ ಕ್ಷೇತ್ರದ ಗಣ್ಯಾತಿಗಣ್ಯರ ಭಾಗವಹಿಸುವಿಕೆಯೊಂದಿಗೆ ಚಿತ್ರ ತಾರೆಯರು ಕಂಬಳಕ್ಕೆ ವಿಶೇಷ ಮೆರುಗು ನೀಡಲಿದ್ದಾರೆ. ಎಂದು ರೈ ಹೇಳಿದರು.